October thla a lo thlen hian ka pangngai thin lo!

Teh tawp mai a! Mi ang chiah lo ka nih duh hmel viau mai.

Nia, mi ka ang chiah lo te pawh a lo ni mahna, ka pangngai lo miau si a le. Hetiang ka nih tanna hi kum tam fu a lo ni ta.. Engpawhnise, a chhan leh vang ka han sawi dawn teh ang.

Furpui nat kum, khuangruahpui sur avanga harsatna tam tak a thlen kum a nih vang pawh a niang, Favang hun nuam leh boruak thengthaw nuam tak kan han chuangkai leh ta chu, rilru a hlim surh mai a. Tlangval rilru thawveng keini ho rual tan phei chuan enghelh reng kan nei lo. Khawchen thin vanga nula rim thulh a ngaih zan vawi tam kan paltlang tawh a, tunah zawng hun khirh kha a liam ta si.

October thla arkaiden zan a ni a, duhthusam ai maha tha zawkin khua a thiang a. Lungrun theih tawpa a mawina zawng zawng phochhuah ngei tum niawm takin Chhawrthlapui chu kawlah a chhuak tan ta phut mai! A eng no teh ang chu! Chhan leh vang awm lem lo tan pawh tih deuh nghulhna tur a ni ve hrim hrim. Chutih laiin he hun Tlumtea thlir taka lo thlirtu tan phei chuan zan duhawm a va ni teh lul em! Helhhawlh avanga zanriah pawh ei thathum thei tawh lo, ka tan ngat phei chuan sawi ngaihna tak pawh a awm lo a ni ber zawk e…

Kei, hmangaihna sawifiah thiam ve lo hian sawifiah lo tul ta thut ta ang se, ‘A laka ka rilru put dan hi hmangaihna chu a ni,’ ti-a ka kawh mai tur mihring nen hun hlu tak hmandun kan tum zan a ni a, ka phur tawh takzet a ni. Khawvela ka hmangaih awm chhun, ka damchhunga ka phatsan tawh ngai loh tur leh min hmangaih ve em em tu a ni miau alawm le. Chhawrthlapui hi kan tan a lo hlu tawh thin a, kan inkar hmangaihna min hriatpuitu leh min nemngheh puitu rinawm tak a ni tlat thin bawk.

Kumin Full Moon lawm kan tum dan phei hi chu kum dang zawng aiin kan urhsun a, a chhan chu thlaleh lo awm tur maiah hian ‘Kumtluang atan’ ti-a inkutsuih kan tum ve tawh vang a ni. Palai te intir fel tawhin phur taka inbuatsaihna kan kalpui ve ve hunlai a ni.

Nulat tlangval hun hnuhnung a ni tawh dawn a, damchhung sawi tling tur khawpa hun hlimawm hman kha thil tihawm tak a ni ve reng a. Dam te-a kan awm a, tum anga hun a inher chhuak a nih ngai chuan vanglai hunte a lo la liam ve anga, kan la ngai dawn si a… kan ti a ni.

Tichuan, phur takin ka chhuak a, phur tak veka min lo dawngsawngtu turte run lam chu ka pan ta a. Veng hran daiha kal tur ka nih vang leh kar a hlat deuh avangin hmanhmawh rilru takin ka pen sauh sauh a. Hah reng ka hre lo. Veng hrang hrang pathum lai ka paltlang hnu chuan ka kal tumna veng ramri ka lut tan ta a..

Khaih khaih khaih…

Lo ngaithla theuh rawh u,

Veng chhung chhiat tawh thu ka han puang ange.

Tun maiah khan ……… a boral a!!

Veng chhung mipuite kan inhriattir a ni e.

……………………………………

Karei!! Ka bing mup mup mai. Ka tlan vak tih ka la hria, ka thlen dan ka hre tawh lo. Mahse, ka thleng hlawl. Mi an lo phu sup sup. Ka au ruai ruai. Dawt ni tlata ka hriat kha a lo dik si tih ka hmu… Ka ngawi. Tin, ka khawvel a tawp ta!

Kha zana ka mualpho dan zawng zawng kha sawi vek dawn ila, mahni mawng hlim mai ka ni dawn si. A chhan chu ka patling thei mawlh lo a ni. Tin, chiangkuang takin ka hre lo hrim hrim bawk. Mi tam fe hian min buaipui a, eng eng emaw min hrilh teuh hlawm tih ka la hre thei. Mahse, ka hmui hian chhang let turin chakna a nei lova, ka lei hian a thil thiam hi a hmang thei tawh lo. Nih dan pangngaia a tih ngei ngei tur ka mit hian mittui reng a pechhuak thei tawh hek lo. A sakruang rial ang dai hnu melh ringawtin mitkhap zai reng rel lovin ka tlingtla ni ta berin ka hria.

Khami tlai khan pangngai takin zanriah an kil ho a, kan inneih tur chungchang sawiin hlim takin an ti ti ho a lo ni. Mahse, nat lawk pawh awm miah lovin a chaw ei kham chu a tlu thut a, a mel awrh awrh a, khuma an mut hnu rei vak lovah mihring a tling zo ta lo nghal mai a lo ni. Kan in barakhaih dan hi barakhaih an tih pangngai hian a sawifiah zo thlawt lova, mahse, sawina tur dang tawngkam a awm miau si lova, min barakhaih takzet a ni ber e.

Dan ang vekin thil kalpui a ni a. Kan tlaivar a, kan tuar tlang a, a tukah kan vui a, hun hi a liam puat puat a ni ber mai. A chhungte nat dan leh tawrh dan te ka hriatpui lo va, ka chhungte buai dan leh chi-ai dan te lah ka hre tawh si se hek lo. Ka aa ruai a. Ka nghilh dup bawk a. Ngaihtuahna reng ka seng thei lo. Engkim hi a tawp vek a, ka tawp ve ta ni berin ka hria.

Tichuan, vaivuta siam chu vaivutah vek chang leh turin kan vui liam ta a. A thlan chu engvang maha kalsan thei ka ni lo, tihluih theih ka ni lo bur. A thlan an vurna lei vung vum pawng chungah chuan ka thu tlat a, laina hnai te’n min awmpui tawp.

Zan hmasa aia tlai hretah chuan kan tiam chhawrthlapui ngei chu engmah hre ve lo niawm tak hian a lo lang leh ta! Rilru a kal thui ngaih ngaih khawp mai. Ngaihtuah tur ber hi ka hre thei tlat lo! A hma zawnga tap thei miah lo kha ka tap thei ve tan. Mahse, ka tah chhan tur ber kha ka thutna hnuai lei chhung thuk takah chuan an lo zalh tawh si. Ka mittui hi hruksen rual a ni lova, min awmpuitu, ka lainate mittui lah dan rual a ni hek lo.

Thil zawng zawng hi sawi a tul tawh lo. Mahse hei, kum tam fu a lo liam ta! Tun thleng mai hian….

October thla a lo thlen hian ka pangngai thin lo!

PU ROVA

Pa pakhat a awm, a hming chu Roneia a ni. A hming phuah chhan ka hre lo, a phuahtu hian duhsak takin hming malsâwm tak a phuahsak ni tûrah ka ngai. Malsâwmna a dawnpui em tih lam erawh sawi châkawm tak a ni lo. Pu Rova hian ro a nei tlêm khawp mai tih chauh ka sawi rih mai ang e.

Kum 1985 khân naupang mai ka la ni a, chutih lai chuan a chanchin ka sawi tur Pu Rova hi kan inah a rawn awm ṭhin. Pa lian lo tak, hmêl pawr fep fawp, a hmêl han en mai pawha mi hausa chhûngkua atanga chawrchhuak ni lo tih hriat ngawih ngawih hi a ni. Thingtlâng lo neia eizawng niin, a theih ang tâwka hna thawk a, chhûngkaw châwm ṭhin a ni. Tha rum a ngah lo va, tei rei peih tak leh mi taima tak erawh a ni thung. A nupui hmasa hi kum khat chuang âwrh an innei hman tihin a boral a, nupui dang nei lehin fa pali an nei tawh a ni.

Ṭum khat chu PWD lama hotu lian pakhat hian an khua a tlawh a, an dinhmun harsatzia a hmuhin a khawngaih a, PWD Labour-ah a thun ve mial a. Kum kha leh chen eizawnna bera a lo hman thin, a chempui leh a hlo thlawh chemte chu a mangṭha a lo ngai ta… Beiseina sâng tak nên Bâwngtuthlawh leh Suahdûr hmanga ei zawng tûrin Lunglei a rawn pan a. Chhûngkua-a rawn pêm nghâl chu huphurhawm deuhva an hriat avâng leh an thlawhlai han kalsan ngawt mai chu a rem loh avângin, amah chuan bul a rawn ṭan hmasa phawt a. Khawpuia inbenbel ve ngei tum rilru tak chungin a hmangaihte lênna tlâng a rawn kalsan a, kan rûn a rawn bêl lailâwk ta phawt a ni.

Naupanga thukhawchâng, chutia kan chhûngkua kan han pun belh tûr chu ka lo lâwm êm êm a. Kei hi unau zînga naupang ber ka nih bâkah, fapa mal ka nih avângin ka khua a har ṭhin rêng rêng a, chutia Pu Rova a lo awm dâwn chu a bîk takin ka lâwm lehzual hlê a; ka lâwm fuh ta rêng bawk a ni. Mi a chhawnchhaih peihin, kan kum mil tâwk leka min kawm hi a thiam êm êm a. Tin, mi hlim thei leh nuih duh tak mai a ni a; amah avâng hian kan chhûngkua kan nuih ho nasat phah hlê. Kan unau ho chuan, “Pu Ro, Pu Ro,” kan ti deuh reng a, tûnlai ṭawng takin kan Idol a ni chiang khawp mai.

Rimawi lamah
A hma kuma ka pate’n Pâwl li Scholarship ka dawn aṭanga ṭingṭang min leisak chu kan perh dûn ṭhin a. Ṭingṭang perh a peih êm êm a, thiam pawh ama tâwkah chuan a thiam viau mai. A thiam dân erawh a thingtlâng thiam deuh mai pawh a. Hun âwl a neih îk chuan ṭingṭang hi a kuah deuh reng mai ṭhin a ni. A hla hriat eng pawh a thlûk anga zût thiam loh a nei lo kha khatih laia ka ngaihsânna ber ṭhin a ni. Kûn deuh chhir chher hian a maimitchhîng siar siar a, a ke per tlat tlat paha a han zût mai ṭhin chu... mit tla lo chauhvin ka lo en reng ṭhin. Ka duh duh hla min thlantîr a, a kutzungpui dinglam tin zuah hmang ngeia perhin leh a kut vei lam khur deuh nger nger chungin a han zût ta ṭhin kha a nia.... ka tân chuan en kham-awm a ni ngai lo. Eric Clapton, Joe Satriani.. tih vêl hi ka la hre ngai lo bawk a, ani aia thiam an awm theih hi ka ring lo hial ṭhin.

Kan inhnuai luahte nên erawh an inkhak phah fo, a chhan chu a ke per kha inhnuai atangin a lo bengchheng viau ṭhin ni tûr a ni. Mahse, ṭingṭang a perh tawh chuan ke per a sim thei chuang der lo. Ka nu-in tih dân thar a rawn hmuchhuak, a ke perna tûr zâwnah chuan puanchhia kan thlep chhah a, ka dahsak ta ṭhin a, a zia phah khawp mai.

Tin, a zai thiam lo nâ-in, a zai peih êm êm a. Pathian hla a sa tam ber ṭhin. A lunglên zual châng erawh chuan lêngzêm lam hla hlui tawh tak tak hi a sa ṭhin a, ngaihnawm ka ti hlê ṭhin. Sâp hla pawh a thiam nual; mahse, a thu lam dân a mak thei lutuk! Tûn thleng pawh hian hla hlui thenkhatah hian Pu Rova hriatchhuah loh theih lohna hla ka la nei nual mai.

Cowboy
Cowboy bu chhiar a lo âtchilh viau ṭhin ni ngei tûr a ni. Cowboy thawnthu sawi hi a thiam êm êm mai bawk a. A khum leh ka khum hi insi deuh thâw-in kan hûng a, zân mut hmunah hian Cowboy thawnthu min hrilh ṭhin. Cowboy thawnthu min hrilh ṭhin hnu khân zânah lehkha ka zir peih phah ta sawt. A chhan chu, ka zir tûra bituk thiam zawh vat vat a, Pu Rova thawnthu sawi ngaihthla paha mut ka nghahhlelh ṭhin vâng a ni. A duh chen chena thui a sawi thei a, a sawi ṭhat peih deuh zânah in-draw a tam deuh a, a phûr vak loh zânah an in-draw tlêm deuh ni maiin ka hria. A changtupa kha englai pawhin Sudden-a a ni a, Sudden-a ka ngaihsân ṭhinzia kha aw... Pu Rova tluk deuh thawin Sudden-a kha ka ngaisâng hial a ni. Mahse, kha tih laia Auh-Law a tih ziah ṭhin kha Out-Law a tihna a lo ni reng a!

Ka ṭhianpa pakhat phei chu a Cowboy thawnthu ngaihthlâk châk vâng ringawt hian a lo riak fo mai. Ka sâwm ngai lo, a dîlin min dîl ṭhin. Pu Rova kan ina a lo awm kha chuan ka ṭhiante bulah pawh ka intihtheih phah khawp mai. A hnu daiha Sudden-a thawnthu chhiar ka chîn ve tâk hnuah pawh khân Pu Rova sawi aia ngaihnawmin ka chhiar leh ta chuang lo. Sudden-a hming pakhat Green (James Green) tih pawh hi a lam dân dik ai chuan Pu Rova lam dân Khreen-a tih kher hian keimahah chuan a chiang zâwk tlat tawh zu nia...!!

Inbual
Ka Pu Rova mizia dangdai leh deuh pakhat chu inbual a peih êm êm mai hi a ni. A hnathawk kal tûr hi hnathawh kawr a inbel hma hian a inbual ngei ngei phawt. Eng anga khawchhia leh vawt pawh hian a inbual a ṭhulhtîr ngai lo. Thlasik laia tui khawih ringawt pawh thil hrehawm a nih lai leh tui lum lova kan inbual ngam miah loh lai pawh khan tui vawt thovin a inbual mai a, mak ka ti khawp mai ṭhin. Ani lah chuan, “Vawikhat inleihna-ah chiah alâwm vawt,” a ti sam êt a. A inbual zawh hian a hnathawh kawr fai fahran lo hi a inbel leh tho ṭhin si a, mak ve tak chu a ni. Nilêngin hna a va thawk a, a lo hâwnah hian a tih hmasak ber chu inbual fai bawk a ni. Nitin vawihnih a inbual ngei ngei tihna a nih chu. Khati khawpa inbual peih si khan fai hmel tehchiam a pu hauh lo thung!!

Ṭhal khaw ro lai, tui har êm êm lai hian vawikhat chu ka pa hian a sawisêl deuh a, a sim chuang dêr lo. Inbual tui erawh a hman tlêm phah khawp mai. Nopui hnih chiah hmangin a la inbual lui ta tho a, inbual hming a put hrim hrim khân a ngaih a tiṭha ni ngei tûr a ni. Ama tui chawi sa hmang thova tui nopui hnih chiah inbual nân a hmang ngam ta chu nuam an ti rei lo hlê ni tûr a ni; a hranpa ngatin nitin vawi hnih inbual phalna an inpe leh ta niin ka hria.

Hmarchapui bâwl
Chawhmeh siam a thiam hlê bawk, a duh ang tâwka Dailuah a kan tawh hi chu tui bîk tak a ni. Inrinni zîngah hian Bâwng ke a rawn khai haw ṭeuh a, chawhma chhûng deuh thaw hi tualah mei chhêmin a puah ṭhin. A rawn khai haw hlima ei a châkawm loh ṭhin tehlul nên; a duh tâwka fai leh thianghlima a siam tawh hnu hi chu ei châkawm tak a ni leh ngê ngê ṭhin. Bâwng ruhkawl lian tak chhûnga a thlîng awm min bunchhuahsak ṭum te kha a va’n hlimawm thei tak. Amah a pa tê si, a saruh ken a lian si, theihtâwpin a han thingthla nghek a, thleng a sawh chawrh ṭum lah a tam. Chaw ei lai a nih pawh sawi thei lo lêkin kan nui leh vak mai ṭhin.

Hmarcha hi thak a tih theih hmêl thin tehlul nên a heh êm êm lawi a, sî hluam hluam chung hian, mittui leh thlantui tla vek khawp hian a ei ṭhin. Hmarcha a hmeh kher loh pawhin a chaw ei hi a sî ve hrim hrim a, a bula chaw ei hi a nuamin chaw ei a titui thei teh asin! Chaw a heh lêm lo; mahse, a chaw ei kha a tui reng mai niin a lang. Chawhmeh mal khaiah chuan Hmarchapui bâwl tluka duh hi a nei ang em aw… tûn thleng hian ka la ti rilru fo. Mahse, amah hian a bâwl duh leh thung miah lo. A chhan ka hre lova, tûn thleng pawh hian ka la hre ta chuang lo.

Ka nû hian a duhzia hria-in a bâwlsak ṭhin a, a’n ei tak tak mai ṭhin hi chu; a hmuhnawm satliah mai a ni lova, a ngaihnawm tel thei asin! A sî nasa leh zual êm ṭhin a ni. Ei ve duh vâng ni hauh lo hian Pu Rova hmarchapui bâwl hmeh lai en châk vâng chauhvin ka nû hnênah hmarchapui bâwl ka ngen phah fo mai. An bâwl tam leh a ei tam a, a tlêm leh a ei tlêm mai a, a ṭhing a awm ngai lo. A lo tam deuh ṭum chuan chaw ei kham dâwn hnaihah chawhmehah pawh hmang tawh chuang lovin a hâwp hmiah hmiah mai ṭhin a ni.

Nuih dân nuihzatthlâk
Nuih dân chi hrang hrang hi a in ang lo thei viau mai. Mahse, Pu Rova nuih dân anga nui hi he hringnun ka hman liam ve tawhah hian tumah dang ka la tawng leh ta lo. A mak dangdai êm êm a, a nui ringawt pawh hi fiamthu tênau a ni sa hrim hrim ringawt mai a ni. Sawifiah thiam chi a ni lova, ziah fiah theih a ni hek lo. Rei tak hi ri lovin a nui dîr char char phawt a, mi nuih zawh tawh lamah maksak tak hian a rawn ri chhuak ve ṭan a, kûk ni chiah si lo, ring deuh fâ hian a tâwp a khâr ta ṭhin a. Tâwpna a rawn siam chiah hian a nuih dân nuihin kan nuihza a inṭan thar ve leh a, a bul aṭangin keini’n kan bei ṭha leh a, ani a lo nui zawm ve leh si, za lutuk hian kan chhunzawm tlâng leh a, a tâwp a rawn khâr leh meuh chuan a ngai tê bawka a bul kan ṭan thar leh a ngai ṭhin. Nuihho tawh vêk vêk chuan tâwp leh mai hi har tak a ni.

Ṭum khat pawh chhûng inkhâwm kan nei a; a hun hman zân a ni. A ṭawng sual palh ta hlauh pek a. Ka û a lo nui chhuak, ka pa-in mitmeiin a khap; amah Pu Rova nuih a lo za ve leh tawh si, a dîr char char a, a tâwpa a’n kûk chiah mai chu ka pa inhmuam-ûp lai pawh a insûm thei bîk lo; kan vai nuih ta ṭiah ṭiah mai. Chumi ṭum chuan chhûng inkhâwm kan ṭhulh ta ringawt nghê nghê a ni.

Pu Rova mize mak leh dangdai tak, hlimawm leh nuizatthlâk tak hi sawi vek sên a ni lovang. A taka tawng tân lo phei chuan awih loh châna lo chân mai awl tak tûr a ni thei hial awm e. Mi tlâwm leh hnuaihnung taka a nihna phênah khan mize ropui leh awhawm tak a nei a, a kianga awm kha a khamawm ngai lo a ni.

A hna aṭangin an bân thut
Kum khat dâwn lai chu kan inah a khawsa ve ta reng mai. Kan chhûngkaw member tak takah kan ngai nghet vek tawh a. Ṭum khat an khua-a Chawlhni hmanga a haw zawk tih loh chu vawikhat mah a haw lo. Chumi ṭum pawh chuan kan ngai êm êm a, kan inchhûng hi a ruak huai mai a ni. Ka ngai zual ber a, zânah pawh ka ṭap ru hial. Ka ṭhianpa a ni a, ka pû a ni bawk a, ka û a ni bawk a, ka nû leh pâte ai mahin a thu pawh ka zâwm zâwk hial ṭhin. A hlawh lâk ang ang hi a mamawh tlêm tih loh chu a chhûngte a thawn vek ṭhin a. In lama a chhûngte pawh an lâwmin an khawsak a zângkhai phah khawp mai. ‘An buhte han seng fel se la, an neih ang angte tiralin rawn pêm thla mai se’ tiin ruahmanna kan siampui a. ‘Kan inhnuai kaw khat hi tiruakin an luah rih mai ang chu’ kan ti a ni.

Chutia hlim tak leh beiseina sâng tak nêna hun a hman ve lai chuan, tlai khat a rawn haw chu a rawn lunghnûr haw khawp mai a. Sawrkâr inthlâk avângin MR tam tak an lo bân a, an bân zîngah a lo tel ve a lo ni. Hre lâwk lovin chhûnah hlim tak leh ṭhahnemngai takin a thawk ve a, tlai bân dâwnah a hlawh an pêk pahin bân a nih thu an hrilh tawp mai hi a lo ni a. Kan ngui rawih hlawm ta mai le! Ka pain a theih ang tâwkin a hnêm a, a ṭawng thlamuan a, ani chu a ṭhu ngawi ngal mai. A en ngai a en reng a, tlaitin thlasik anga khêl lova a lo tih ṭhin inbual zai rêng a rêl lo.

Chaw ei a lo hun a, ngawi rengin a rawn kîl, keini naupanghovin kan be ngam tawh si lo, a khât mawi tâwka ka nû leh pâ an ṭawng leh bauh ṭhin tih loh chu kan ngawi ṭhap mai a ni. Hmarchapui bâwlin a chaw ei a titui zo tawh lova, ni dang angin a chaw ei a sî ta bawk hek lo. Ka ngaihtuah phâk ang tâwkin pawi ka tihpui a, ka sawi thiam si lo. Ka chaw ei a tui bîk lova, midangho pawh chaw ei thei rêng an awm lo.

Pu Rova a ṭap!
Chaw ei kham chhûng inkhâwm chu a hun a ni lo. Mahse, “Keima’n kan hmang ang e,” tiin Bible a chuh a, châng tawi tê a chhiar zawhin he thu hi a sawi ta a.

“Kei mirethei hian Pathian malsâwmna tam tak ka dawng a, chhiar dawn ila chhiar sên rual a ni lovang. Kan Pathian hian hmangaih tâwp lovin min hmangaih a, kan tâna ṭha tûr hian ro a rêl ṭhin a ni. Tuna ka dinhmun pawh hi ama ruatah pawm i tum ang u. Hna thawk lo, chunglêng sava te châwm ṭhintu kan Pathian hian min ensan ngai dâwn lova, min thlahthlam ngai hek lovang. Vânduaina emaw kan tih pawh hi amah min hnaihtîrtu zâwk lo ni sela, a hmangaihna kan hmuh chian lehzualna lo ni zâwk se tih hi ka rilru siam dân a ni. Hun hei leh chen hi in chhûngkaw takah min pawm a, hlim leh zalên takin kan chêng hova, lâwmthu sawi sên loh hi in lakah ka nei a ni. Ka sawi thiam lova, mahse, Pathianin ka chunga in ṭhatna zawng zawng hi a lêt tam takin a vûr ang che u tih hi ka ring tlat a ni....”

A sawi zawm thei lo, a ṭap ta tlat! Pu Rova a ṭap, ka Pu Rova ngei kha a ṭap a ni! Kei chu naupang chhe ṭah hian chhuak lutuk maiin ka ṭap ta hawm hawm mai. Ka ûte lah insûm thei bîk hek suh, ka nû thlengin an insût ri ta hrup hrup mai. Ṭahnain kan inchhûng khat a ni ta ringawt. Mangang takin ka pâ ka va melh a, ani pawh insûm tum takin a hmai zawng zawng a lo sen vek tawh a. Chutah, patling ta na nâ nâ chu a lo dingchhuak a. Pu Rova hnemna thu leh Pathian thu hrang hrang bah deuh nuaih hian a rawn sawi a, a thusawi pawh ka hre mumal lo. A ṭawngṭai a, kan Amên meuh chuan kan mit a lo bui lûk hlawm tawh. Chutah, Pu Rova a rawn ding ṭha leh…

“Ka thiam loh a ni. Kan chhûngkaw boruak ka tikhaw-lo vek mai. Min ngaidam teh u. Ka lungchhiat chhan kha ‘bân’ ka nih vâng a ni lo. In mi hmangaihna leh in mi khawngaihna hi a thûk ka ti êm a, lâwmna avânga lungchhia zâwk ka ni. Ka damchhûngin he chhûngkua anga chhûngkaw nuam hi ka tawng leh tawh ngai lovang. Ka hre reng tawh bawk dâwn a ni. Hlim takin awm ila, i nui ho leh zâwk ang u.

“Hei a hmingin hlawh pawh ka rawn la ve a, naktûk zîngah ka han bazâr ang a, tûkṭhuanah vawksa tui tak kan hmeh dawn nia. Tui lutuka siam dân ka hria alâwm, in ei teuh dâwn nia...” tiin naupangho chu min han hnêm kual hlawm a. Amah berin nui hmêl a put leh theih tâk avâng chuan kan boruak pawh a zâng leh ta hawk mai.

Zân hnuhnung chu..
Homework tih tûr kan neih ang ang chu phûr lo takin kan ti sap sap a, ka rilruah ka zirlai rêng a lang thei lo. Naktûka Pu Rova a haw dâwn chuan, tunge zânah Cowboy thawnthu min hrilh ta ang? A khumah hian tunge mû ang? Tunge ṭingṭang perh min zirtîr ta ang? Engtinnge kan chhûngkua hi hlim tak leh nui tâwp hlei thei lo khawpa kan nuih theih tawh ang? Hmarchapui bâwl kan hmeh leh hunah Pu Rova hi kan va ngai dâwn êm! Ngaihtuah tûr a tam lutuk. Ka mittui chu ka hru ka hru mai. Ka nû a rawn lût thut a, ka ṭap ru lai chu min rawn phâwk chiang kher mai. Min en vang vang a, engmah sawi lovin a chhuak leh vat a. Ka zak hlê.

A hnû lawk chuan, kan room-ah Pu Rova chuan ṭingṭang a rawn pawm lût a, “Bawiha, i zirlai kha chu dah tawh rih mai rawh, i nuin, ‘Naktûk zîngah i tihzawm leh mai dâwn nia,’ a ti, hawh i zai dûn ang hmiang,” a rawn ti a. Rang takin ka lehkhabu ka khup a, a bulah chuan ka ṭhu nghâl vat a. Nidang ang bawkin ka hla duh min han zâwt leh a, a hla zût ṭhin zînga nalh ka tih ber chu ka han sawi leh vat a. A ngai tê bawkin per ri thlep thlep pah chuan a zût khûr leh ta ngat ngat mai. Eng dang ka rilruah a lang leh tawh lo. A ṭang bawk a, zan dang aiin a thiam ka ti zual hlê. Mahse, a tâwp dâwn hnaih lamah chuan, lungchhiatna bawkin min tlâk buak leh ta... Naktûkah chuan Pu Rova hian ṭingṭang min zûtsak dâwn tawh lo... Ka mittui a rawn hnâm leh dâwn ta mai!

A ṭingṭang kuah lai chu a dah thla vat a, keimah zâwk chu min kuah ta a. “Bawiha, engatinge i lung a chhiat viau? Ka han haw ang a, ka lo kal leh thuai dâwn alâwm. Theihpatâwpin hna ka han thawk ang a, pawisa ka khâwl char char ang a, kan chhûngkuain kan rawn pêm thla dâwn alâwm. Ṭap tawh suh, naktûkah ka haw dâwn si a, hlim deuhva inkawm ka duh a nia. Kei pawh hian ka ngai dâwn lutuk che u a, in exam zawh veleh i lo zin dâwn nia. Ka lo hruai ang che, i nûte pawh kan dîl dâwn nia. Ramah kan kal ang a, nuam i ti khawp ang,” a ti a. Ka phur thar leh ta!

Ram kal chungchâng kan sawi zui dûn hrep a, a tâwpah chuan ṭingṭang bawk chu a kuah leh ta a. “I ṭingṭang hi chu ka ngai dâwn khawp mai, ka haw hunah chuan ṭingṭang perh tur ka nei dâwn tawh si lova,” a ti ta! Rang takin ka pate room-ah ka tlân phei a, ka pa hnênah chuan ka ṭingṭang chu Pu Rova pêk ka va dil a. Ka pa chuan ka lu-a tuai hauh hauh pah chuan, “I phal phawt chuan pe rawh, Bawiha,” a lo ti a. Ka tlân phei leh vat a, “Ṭingṭang hi naktûkah hâwn rawh,” ka va ti tawp a. A meng deuh kâwk a, “Ni love, ṭingṭang i nei dâwn tawh lo asin,” a ti a. “Pawi lo, kum tâwpah Scho’ ka la leh dâwn tho a, kan lei leh mai dâwn alâwm,” ka tih lai chuan ka pâ a rawn lût ve a. “Rova, Bawiha hian ṭingṭang kha a pe duh che a nih chu, lâwm takin la rawh, a hlim zâwk ang,” tiin thutak deuh tak hian a rawn sawi a. Lâwm hmêl tak hian ṭingṭang chu a kuah nghet sauh a, a’n thlêk vang vang a. Engmah a sawi zawm thei ta bîk lo; a lungchhia a ni…

Mut zai kan rêl a, zan dang zawng zawng aia ngaihnawm hian Cowboy Sudden-a (a hming dang atâna Khreen-a an tih bawk) thawnthu chu min hrilh leh ta a. Ka khumah lo mu vê-in min kuah pah bawk a, kha zân tluka ka thlamuan ṭum leh mut nuam ka tih zân kha a awm leh tawh kher lovang. Lungmuang takin a âwma bei chung chuan ka muhil ta a.

Vânduaina thuahhnih!
Zîng ka han harh chu Pu Rova kuah renga la inhria khân rizai lek ka lo kuah a. Ka hriatchhuah chuan, a hâw ta mai emaw tiin hmanhmawh takin ka zuang tho a. Choka ka va luh chuan ei rawng hi a lo bâwl sar sar a. Sa rim a nam châk châk dânah chuan nizâna a sawi ang khân Vawksâ a lo han lei tih ka hre nghal mai. Thingpui min lo thlit vat a, kan inkawm luam hnu chuan, ka homework chu ka tihsan ta a.

Tûkṭhuan Pu Rova siam tui tak chu puar takin kan kîlho va. Chaw eikham chuan keini unau chu School kal tûrin kan insiam a, tûk dang ang lo hlê mahse, Pu Rova’n ka ṭingṭang pêk a hawn dâwn avâng chuan a rûk takin ka hlim ru tlat. Ani chu Dar 12:00 Bus-a chhuak tura inruahman a nih avângin a la hmanhmawh hran lo. Mittui êm chu a tla tawh lova, inthlahna thu leh exam zawha an khua-a zin chungchâng sawi pawlh nuaihin kan inchibai a, School lam kan pansan ta a.

Chhûnah chuan nidang angin ka hlim thei rêng rêng lova, bân lâwk kâra thiante nêna infiam lah ka peih hek lo. Pu Rova ngawt chu ka rilruah a awm a, ka ngai ngawih ngawih a ni. Chhûn chawlha kan haw chuan huphurh lâwk ang ngeiin a lo chhuak hman tawh a, ka ngai kher mai! Ka ngai takzet a ni! Khatih laia ka awm dân ni-a ka hriat ber chu, sawi fiah theih si loh hian ka ruak huai ni berin ka hria.

Chawhnu kan ṭan leh a, kan zirlai hriat alawi ka nei lova, Zirtirtute thusawi ka bengah rêng a lût lo. Period inthlâk dâr ri bawlah hian ka harh leh zawk ṭhin. Period tâwp ber kan kal lai chuan kan Miss chu pâwn lam aṭanga rawn be duh an awm avângin a chhuak lawk a, ‘Tunge ni ta?’ ti rilru chungin pâwnlam en chuan kan dâk huang huang hlawm a. Ka va hmuh chu kan ṭhenawm tlangvâl, u Sêna a ni tlat mai. Eng thil nge thleng ta ang le? Ka bangbo khawp mai.

Rei fû an inbiak hnu chuan Miss chu a rawn lût leh a, a rawn hawi kual deuh ruai a, min hmuh chuan min rawn pan ta chat mai! Keima chungchâng a ni ngei mai le? Ka beng bulah zawi deuh hlek hian, “I lehkhabu kha khung fel la, i hâw thei e. Pâwnah sâwn tlangvâlin a nghâk che a....,” a ti ringawt a, sawi zawm tur nei ang deuh hian a ang zuau a, a ngawi leh daih a. Bangbo ang reng tak hian ka inkhung mawlh mawlh a, kan class-a mite zawng zawng chuan mak ti tak hian min en ṭhap niin ka hria. Zawi muang hian ka chhuak ta a, U Sêna chuan min lo kai vat a. A piah deuhah chuan, ka ûte pahnih an ipte ak chunga an lo ṭap fap fap hi ka va hmu a, mak ka ti kher mai! Enge thil ngê thleng ta ang le?

U Sêna chuan min kai a, kan kal ta a. Ka ûte’n min zui; an ṭap an ṭap mai si. Thil awmzia ka zâwt ṭhin, an sawi duh bawk si lo. Ka buai ta takzet mai. U Sêna chu a ding a, huphurh hmêl tak hian he thu hi min hrilh ta a... “I Pu Rova te chuanna Bus kha a accident a, a thi zîngah a tel hlauh alâwm mawle, i pate’n rawn hruai tûr che uin min rawn tîr a,” a ti ta! Ka bîng mup a. Ka sarâk nghâl chiam ni ber hian ka hria... Min kaihna aṭanga chuan ka tâl chhuak a, “Pu Ro.... Pu Ro...” ti-a au chungin ka tlân ta chiam mai a. U Sêna’n min ûm; min man bet; ka tâl; ka râk vak vak a. Engmah ka hre chhunzawm ta lo.

Ka harh leh chuan khua a lo thim ṭêp tawh mai a. Ka nû hian puan huhin min lo dep a, ka harh tâ chu a lâwm hmel hlê mai. Engtinnge kan in ka thlen a, engtinnge ka khumah ka mut pawh ka hrethiam tawh lo. Ka hawi â ruai a, ka theih tâwka ka awmdân ka han ngaihtuah lêt chuan, Pu Rova chu ka hrechhuak ta! A accident a, a thi! Ka mumang niin ka hre thut a, ka nû chu ka hrilh vat a, “Nu, Pu Rova kha ka mumangah a lo accident a, a lo thi a...,” ka’n ti mai chu(h)! Ka nû mittui a rawn dîr chhuak zawih a, a ṭap ta hlawp hlawp mai. Mumang a nih lohzia ka hrechhuak ve zui nghâl, kan ṭap dûn ta hlawp hlawp a. Ka nû chuan, “Bawihte, i pu Rova ruang chu a rawn thleng ṭêp tawh ang; tlangvâl i nih kha, chhel taka awm tum ang che aw…..”

Chhel dân ka thiam lo, a awmzia ka hre lova; ka ngaihtuah thei hek lo. Ka hriat chhun chu, Pu Rova ka khawngaih a ni. Nizan maiah khan ka bulah ngei hian a mu a, min kuah hle hle a, min duat êm êm a nih kha! Ka ngaih em em chungin min hawsan a, a thi leh ta si maw? Khawvêlah hian ka hmu leh ngai tawh lovang maw? A ni thei lo, ka ring thei lo, ka phal bawk lo, ka phal lul lo a ni! Pu Ro, a va mak teh thut ngai ve …! Ka ṭap bâng thei ngang lo. Heti khawpa ka tuar a nih chuan, a fate phei chuan engtiang taka nasa-in tuar ang maw?

Ka nûte min ngaihtuah lutuk chuan kan in bula nurse, U Te-i an va ko ta ringawt a. Inchiuna rawn kengin min rawn chiu a, nâ ka hre lova, inchiu hlauh nachâng pawh ka hre tawh hek lo. Mahse, ka mut a chhuak ta tlat. Ka ngaihtuahna a vai riai riai a, engmah ka hre leh ta lo…

Pu Rova RO kan ṭahpui...
A hnua ka ngaihtuah lêt leh ngial pawhin, ka muhil ka harh leh hnua thil awmdân zawng zawng kha chiangkuanga sawi tûr ka hre tawh lo. YMA-in kuang an siamsak a, an khaw lama phurh a nih thu te kha chiang lo ruai chuan hriain ka inhria. A ruang pawh ka hmu ngei tih chu ka hre nain, a thi hmêl awmdân leh a hliam tawrh dân pawh ka hre chiangkuang tlat lo. Hei erawh hi chuan tûn thleng hian min la vêl thin... Khatia a kal ta kha, Bus-ah pawh chuan rem leh rem lo pawh sawi lovin ṭingṭang kha a pawm tlat a, anmahni bawihsâwmtute’n a ruang an zu hlâwm lai pawhin ṭingṭang chu a la kuah reng an ti. Aw… Pu Ro, kha ti khawp khan maw ka ṭingṭang pek che kha i lo hlut le…!!

He ṭingṭang, neitû nihna chelh rei lo teh mah sela ‘Pu Rova ṭingṭang’ kan tih tlat hian, kum 15 a liam tawh hnu, zanin thleng hian min la vêl a, min la vêl zui zêl dâwn a nih hi! Kan chhungkaw ro pawimawh tak hi a hming pu zo lo tak Roneia khân min hnutchhiah a. Ro dang min hnutchhiah tûr nei lo mah sela, kan tân chuan Pu Rova RO min hnutchhiah hi a hlu takzet a, kan vawng ṭha reng tawh ang.

Pu Ro, nang chuan min tihlim ṭhin kha a ni a, i RO min hnutchhiah erawh hi chuan min vêl ṭhin a sin…!

(misual.com-in Thawnthu tawi inziahsiak a buatsaihah he thawnthu hi ka ziak a, ka rin lâwk ang rêngin lawmman a dawng zo ta lo)

CH CH PA!!

Pan lai hun nuamte’n mual an liam zo tawh a, vânglai hun hlimawm meuh pawh a chuai ta ruai ruai mai. Chhuihthangvâla’n zuapa ka chang a, hrailêng chawiin puak, pawm leh kaih ka fawmkem ta! Chhangchhe pa nunchan zirin, ‘Ch Ch pa’ tiin lenrualte’n ka hming an sêl ta!

Het chheiraw!! Chhuihthangvâl nun ka chen chhung khan tûn hun hi ka dâwn pha lo va, ka beisei ngai hek lo. ‘Tiam tlat e’ ti-a zungbun kual tle tak inbuntîrna piah lamah hian hlimna chauh ka lo beisei ṭhin a, famkimna tualah lêngin Vân rim nam rum rum khawpa hun nuamah ka lêng reng dâwn emaw ka lo ti. Hnai lo mai!! Vân rim chu sawi loh, zun hîng rim ka nam reng zâwk ta si! Nupa nun ka zirlawkna-ah he’ng hi a tel lova, ka inbuatsaihna a ni bawk hek lo.

Inbuatsaih loh Topic-ah Exam ka bei mêk a, pass zo tak ang i maw? Chhân thiam a har a, vâl hian ziah tur ka vai a nih hi! Pen hmawr seha hawikual hruk hruk reng hi ka pass phahna a ni dâwn lo tihah ka chiang a, theihtawp chhuah a ngai a ni. Zir miah lo pawhin he exam hi pass ka duh tlat mai si le… Khawi nge.. vâl hi…

Ka sakhming hi zalêng zawng te’n sêlin, phuahchawp hming mak tinrêngin chawi mah se la, hringnun lamtluang ka chhuina kawnga ka nih tûr rêng ni mai ka lo ni. Ka harhchhuak ta! Tu ka dem lo’ng, zahah ka la hek lovang. Ka hraite avâng hian koki insanhleih bûr khawpa ka lo awm a, hîng hem hem rim nam reng ka lo nih palh pawhin, ka thai thinlai a dam chhûng chuan; engah ka hlim loh lem ang?

Chatuana hun ka hman dân tûr pawh ni hlei lo; a ṭul leh nau êk ka su eng puat anga, naute nu pawnfên thleng pawhin ka hmâ tel mai ta lawng… Tih tak êmah chuan a pawnfên ka sûk tûr zûna uai hian a ni lawm ni tlângrêl dâwn lêk lova ka lo lên ṭhin? Tunah engah tlângsêl chu ka hlauh viau lem ang? Amah avâng vêk hian a ni lâwm ni vawi tam khuang ruahpui sûr ka do va, thim hnuaia an rûn ka pan ṭhin? Sawi tak zêlah chuan, he nu vâng tho hian a ni lawm ni vâl dang tâwna hmaisen ka put a, kuttum hial ka lo lek tawh?

Engpawh huama ka thlan, ka hmangaih hi chhawmdâwl a ngaih lai hian ka phatsan ang maw? ‘Pâ lo’ tih leh ‘Thaibawih’ tih hming satliah tak put hlauh vâng ngawt hian a duh anga che chhuak thei lovin ka chhungril hmangaihna hi ka up bet ang maw? Teuh lo mai, a teuh lo mai. Lum hlumah pawh ka hlawh duh ṭhinna thinlûng kha, pawnfên nêm nuai satliah mai mai hian ka lanchhuahtir thei lovang maw? Chuti a nih ngat chuan kei hian lum hlum ka ngam tak tak hauh lo tihna a ni ngei ang le!

Kâ maia hmangaihna lantir mi ka ni tûr a ni lo, thiltih hmang ngeiin ka thinlûng hmangaihna hi pârchhuak rawh se. Exam ka beih tawh a zawnga exam nuam ka tih berah a chang ta! Ka inbuatsaih loh zawhna chhang si hi, ziah tâwp dân pawh thiam lo khawpin vawi tam paper ka dil belh ta! Haleluiah! Fail rêng ka hlau ta lo, thiam loh chantîr lah ka hlau na hek lo. Khawvêl hi ka tân a pâr a, chu a pâr chu tudang ni lo, kei ngei hian ka tlân ṭan ta mêk a nih hi. Mi vannei ka va ni teh lul em!

Ka ziah zawm peih tawh lo, a nih nih nih tîr ula, in duh angin chhunzawm mai teh u.. Hei erawh min hriatpui thung ula, ‘ka testimony a ni kher lo’ tih hi..

Mittui a hul ang

A phuahtu ka hre mai lo tlat. Tun laia ka hla duh thar hi ka han dahchhuak ve ngawt ange. Ka duh dan danin ka sep kual vel dawn bawk a, tu pawi mah ka sawi em lo’ng chu maw?





A dik a ni :
He leiah hian hringmi lungngaihna tawk ngai lo kan awm lo va, kan tawrh dan leh kan tawn dan erawh a inchen lo thei khawp thung ang le. Chhung khat laina te, thenrual tha leh kan hmangaih ten mual min liamsan a, kan tapa kan rum thin a ni, tiraw? Hringnun kan chan chhunga lungngaihna kan tawrhna zawng zawngte hi hmuh theihin han awm teh reng sela aw... Pan dam tawh hnu ser lian pui pui ang mai hian a sawr bawk thlehthluah hlawm ta ve ang. Lungngaihna avanga kan mittui tla zo zaite hian he lei hi lungngaihna khawvel a nihzia a nemnghet a ni.

Tap chungin kan damchhung ni kan chhiar tan a, lungngaihna chhum dum tam tak paltlang hnuin tap chung bawkin kan laina te’n min thlahliam leh thin a ni. Thlan khur thuk tak chhunga kuang mawi em ema chei hi hmangaihtu mit atangin a mawi ngai lova, hmuh a nuam hek lo. Tahna ti zualtu leh lungchhiat belhchhah mai tu a ni zawk thin. Thlan lung lian leh mawi taka chei pawh hian a cheitu lungawina famkim a pe thei lova, tahna mai thlen zawk thin. Kan hmangaih leh duh tak, kan ngaih em em leh kan thlakhlelh te; he khawvela hmu leh tawh miah lo tura kan then tluka na hi a awm thei chuang dawn em ni?

Hringnun piah ram hi lusun vanga lungngaite inhnemna awm chhun a ni a. Khawvel dana beiseina zawng zawng a bo tawh hnuah, Van rama hmangaih kaltate kan tawn leh hun tur suangtuahna hian kan lungngaihna a hnem ber thin a ni. Chu khawpui mawiah chuan lungngaih mittui a hul tawh anga, thihna a awm leh tawh dawn lova, chatuanin hlimin hmangaihte nen kan leng za tawh dawn a ni. He leiah lungngaia tapin rum thin mah ila, thihna-in min tithenin luaithli nul thin mah ila, thihna ten ro an rel tawh lohna hmun Ropuina ramah chuan Lungngaih leh tah, lusun mangan a awm tawh dawn si lova.

A thluk a mawi a, a thuin min hnem :
Thu tha leh mawi tak hi hla a tling zo lova, a ti hla tu ber zawk chu a thluk hi a ni awm e. He hla thluk hian lung a kuai em em a, thinlung chhung a khawrh thleng thei tlat a ni. Min timur seng seng thei hla hi ka ngaithla leh zauh thin a, chu’ng zinga pakhat chu he hla hi a ni e. A solfa note atang ringawt hi chuan hla mawi loh hmel tak niawm hi a ni roh va. Sang zawngin tluang takin a chho dawn emaw tih laiin, note engemaw zat kal kanin a chhuk san leh ang vut a. Tin, a tanna note a hniam si, a thunawn sang lai ngaihtuah thlen loh palh phei chuan a key lak sual awl tak tur a ni. Mahse, heng sawisel a kai theihna tur zawng zawng hi a mawina belhchhahtu an ni tlat si. Mi nazawng sak mawi ve chi a nih lohna hian a hlutna a ti sang hle bawkin ka hria. A thu leh a thluk inhmeh dan hi chu sawi ngai lovah dah teh ang.

He lusun hnemna hla thu tha tak mai phuah chhuaktu hian lusunna mittui kar atanga a phuah a nih loh ngat chuan, ani tluka midang rilru hriatthiampui thei tur hi an awm ka ring hauh lo mai. Lungngaih vawr tawp tuar chung chuan he lei hi ‘Lungngaihna hmun’ tih loh theih a ni tlat lo a ni. Chu lungngaihna hmuna lungngaite tan ‘Khawpuipui mawi’ min han chhawpchhuah sak hi, a hming atang mai pawh hian damna sawng sawng tur a ni tlat a ni. Thu hma lamah ka sawi nual tawh, sawi thui tawh lovang.

Hei chauh erawh..... A lungngaih mittui luang hi a tam mah mah em aw? Tuifinriat ang ema tam chu a ni lo deuh ang a.....? ka ti deuh a. Mahse, hei pawh hi lungngaia tap mek tan chuan sawisel phal a har hle tho si ang le.

A satu :
Lalremmawia hian a aw len zia a phochhuak tha hle mai. Beng a fah takzet. Engemaw laiah hian a tih len a tum lutuk em aw... tih deuh lai chu ka nei. Mahse, a tha thlawt tih bak sawi belh vak tur ka hre lo. Dil hauh lovin ka blog-ah ka zaitir ringawt a, min ngaithiam thei em ang chu maw?

Rebek-i (Mizo Idol 2009 Contestant) khan he hla hi Idol contest-ah zankhat chu a rawn thlawh pek a, chumi tum chu alawm ka mur sung sung ka tih tum chu! A aw a lian a, a hneh em em a, zai mawi tum hran em em lovin a rawn sa tawp mai a. Kha mi tum zet kha chu min hneh a ni. A video kha ka zawng rilru thin a, ka hmu mai thei hauh lo. Nei hlauh ila chuan ka dah tel chak ngawt mai.

Awle, ring deuh hlekin Main Volume pe la, Bass Volume down hlek bawk la, han ngaithla nawn leh ngat teh le...

Zinkawng turu chu!

Pa neinung ni ve hek lovi, Four Wheeler ka nei ve si lo. Motor ka lo rui ve thin khanglang bawk nen. (Ruihthei mi hi ka ni ve hrim hrim a) Sumo Seat hnung, tukverh bul lo leh nghala Zawlkhawpui han pan chu ka zuam chiah si lo. Thil tul pawimawhah loh theih lova zin a ngai miau mai si. Thlan tur dang awm tawh hek lo, Bike-in ka thianpa nen kan chhuak ta teh poh a. Fur khawchen vanglai tak leh kan zin tul hun a inrual miau a. Thla lawn tur ang maiin Rain Suit nen kan inha puar lian thur mai. Kan vanneih a siamin kal lamah chuan Ruahin min hel zel a, ruah mal khat pawh nan lohvin tluang takin kan thleng a. Kan lawm hle.

Zinkawng turu ka tih tak zawk chu, kan haw lampang zawk kha a ni. Heti hi a ni a, kan chhuah tum hunah chuan chhuah mai nuam lo tawkin Aizawlah chuan ruah a sur cherh cherh mai a. Kan han nghak han thak phawt a. Hetih lai hian ka Bike ke hnung lam Brake, tha tawpa han rah ngheng pawha ding tha duh der lo mai chu, Kulikawnah kan han siamtir pah a. Theihtawp chhuaha hmanhmawh leh thain min siam sak a, Rs. 20/- min chawitir a, tlawm kan ti hle.

Khawchhia a veng kuar a, ni a lo lang ta suar suar a, phur takin theih pa tawpa chakin kan lim phei ta. Khalh thiam lo deuh zawk mah ni ila, kal lamah ka khalh tlem zawk avangin a fawng vuantu nih ka tum ve ran tawh a. Chawhnu thlang her bawih tawhah Aibawkah zing chaw kan ei ve chauh a. Kan tlan tluang ve hle a, rilru-a Hmuifang tlang thlalak tum ran chungin kan tlan par par a. Hetih lai hian kawngchhaka Zotuithiang a lo khawhthlak heuh heuhna hmun thlen tawh hian kan insum thei ta lo thin a. Han chawl khaw muangin kan chhawlhal kan han tireh leh thin a.

Hmuifang tlang kan han thleng. Chhum a lo zing khat tlat mai. Thlalak lam chu sawi loh kan kalna tur pawh kan hmu thei chang chang mai si. Ui tak chungin kan tlan pel zel a. Ruahpui vanawn namen lova tam hian Thenzawlah min um lut ta. Han tlan luih chi zia zang chi ni hek lo le, kan chawl ta vang vang a. World Cup khami zan tana First Match kha kan han en leh ang ren rawn bawk a. Khualzin kal lai mai kan nih avang erawh chuan en tui a har hle.

Khua a thim tan ta! Ruah lahin zaithiam SP-i ang maiin ban zai a rel si lo. Heti hrim chuan kan tlai lutuk dawn tiin kan tlan lui leh ta a. Chawngchilhi puk kan thleng a, hmai thip thawt thawt khawpa min nan tu ruahmal lian lutuk hi han zia deuh phawt teh se tiin kan han lawi chho a. A lo hul nuam khawp mai. Tin Buangpui khawtlang an fakawm ka ti khawp mai. Vawt ti-a khur bauh bauh tawh chunga he puka lut hi kan ni. Mauthing fawmsa, chhem mai theih tura phuai meh sa thlap nen thukah an lo chhep sa diam a. Kan han dep kai a, kan khur zualpui pawh a reh fel nghal. Buangpui khua hian Chawngchilhi puk hi an chei hnum reng a, a kawng hnimte sam faiin khualzin tlawhtute tana kal hrehawm lovin an enkawl reng a ni.

Ka thiana chempui thar lei hmang chak chuan mei chhema ka buai lai chuan puk chung lamah min lo han lawnchhoh san daih a, hre lovin ka lo bia ka lo bia a, min chhang tawh si lo. Rei fe kan inkoh lauh lauh hnu chuan huh hnuangin a lo lut ve a, ani chakai a lo han khawrh chu niin! Tui tai put mai maiah chakai a awm ngai loh thu leh ka lo mangan hman tep thuin ka han chhuahchhal ngial a, a nui mai mai duh chauh leh nghal. Tumbu tal rawn hawn se, kan mei chhemah chuan han thukphum ila, englo ilo hmehah a tui dawn dawn nen. Kut ruakin a lo kir miau si.

Puk chu nuam teh mahse, kan riak dawn a nih si loh chuan han chawlh reng chi a ni si lo. Kan tlan leh ta a. Rilru a hmanhmawh si, chhum a zing chhah si, ruah a tam bawk si. Tih ngaihna a vang duh khawp mai. Rilru tawt zual tihreh nan kan han zai a, aw rawl tawp tawpin kan khek a, a nuam ve fu. Mahse, a nuam rei lo. ‘D Chambawihpui’ a introduction (Dang lead) atangin kan tan leh chiah a, a thunnawn kan uar chho dawn chiah tih hian veilama kawng kual lo awm chu ka kualchhuak chiah a. Sawi tawh angin kawng chu chhum vangin a lang chiang lova, a lang var phei put vek a. Kawng kuala Speed ka down hlek han tlan chak leh tan chiah chu chirhdiak chhah nal zetah hian ka lo tlan lut a lo ni a. Kan tei ta nguan nguan mai. A hnung atangin thiana chuan ‘Brake, brake, brake...’ a rawn ti. Kei chuan brake chi-ah ka ngai tawh lova. Tluk loh theih hrama tlan tlang mai theihah ka ngai a. Ka break chuan kan tleng vak ka hlau a ni. Mahse, rin aiin diak chu a lo thui a, hreh tak chungin ding zawngin kan tlu ta nge nge a.

Bike hi ka khalh rei ve leh ta fu a, ka tlukpui ngai meuh lo ang a ni. Tluk hrim hrim hi a Pathian thu lova, ka duh loh zawng tak a ni bawk. Helaia kan tlu tur pawh hi hreh tak ka ni. Hreh tak chunga tlu dawn tih inhre tawh lai vel rilru hi alawm sap hovin ‘Point of No Return’ an lo tih. Mahse, ringtu ngang kan nia, tlu mah ila, kan tho leh ve mai bawk a. ‘Tlu tawhte chungah i tha si’ tih kha rilru-a awm reng chungin thlamuang takin kan tlan leh ta a. Mahse le...

Km 10 dawn a ni tawh ang a. Thil hriatchhuah pawi tak ka nei tlat. Ka kawrhma Jacket chhung lama ka Mobile phone ah chu ka han dap a, a awm ta miah lo. Chhei le! Kan tlukna-ah khan ka thlauh chiang mai. A hma lamah kha chuan ka la ak ngei. Mahse, hei a awm ta tlat lo. ‘Let it be’ hla kan lo sak lai a ni ang tih ka hlau khawp mai. ‘Let it be’ ka ti phal ngang si lova, ‘bei nge sei run dung’ ti chungin ruahsur leh chhum zing karah kan let leh ta. A va peihawm lohvin, a va phurawm loh tak em! Thiana pawh ka zah rilru khawp mai. Phur takin min kirpui leh a, amahin a khalh let nghe nghe. Kan let leh kawngtluan chuan, Phone chu kan va hmu leh angem? Hmu leh ta ila, chirhdiak chhah tak karah khan a lo chhe tawh mai lo’ng maw? Ruah hian a nan ngei dawn a, a huh vek ang. A that tawh ka va ring lo em! A nih loh paw’n, motor an tlan ve reng si a, an lo chilsawm vek tawh a ngem? A bul hnaia midum buka awmte khan an lo chhar tawh zawk ang a? Ngaihtuah tur a va tam em! Aw.. ka phone, kum hnih chuang lai nang nen hian kan lo inchul nel ve tawh a, ka va ngai dawn che em! Nang ka neih hma che a, ka phone hmasa lah chu tuitla bawkin mual ka lo liam tir tawh a. Nang pawh hi i thihna hi a va tuidul leh dawn em! I awmna a tui dul em avang hian Mittui em zawng ka chhuah rih lo teh ang.

Han kal han kal chuan kan thleng ve leh ta mai. A rang a rangin ka chhuk a, Torch Light te chuan kan chhunkual pap pap a, a va vang em! Ka hloh hlen ta a ni chiang mai le! Diak intanna lai atang chuan uluk zawka zawng tha turin ka let a, thianpa chuan Bike Head Light-in a lo chhun kual char char bawk a, ka zawng thla tan leh chiah tih chuan, a rawn au a, ‘Hei le’ a rawn ti. Fiamthuin min rawn chhaih a nih ka la ring deuh. Mahse, kan hun tawngah hian fiamthuna chi a ni lo. Rang takin ka tlan thla a, chirh karah chuan a lo inphum kak a, rang takin ka chhar vat a. Lawmnain ka lo khat ta nghal a.

Kawng sir midum bukah chuan chawl turin kan lut ta a. Thil awmzia kan han hrilh a, an lo fel ve khawp mai. Puanchhe fai an han ngaihtuah vat a, Phone-a chirhkai zualpui chu ka hrufai a, Polythene bag chhungah dahin thlauh leh miah tawh lohna hmunah ngaihtha takin ka dah tha ta a. Kan phone hmuh leh lawm nan chuan midum ho nen chuan kan dawm tlang a, kan thilphal tawh hle.

Kan in tam fu a niang. Kan tlan leh chu, thiana Bike khalh dan a dik ta hauh lo mai! Zim te tein a kual a kual a, a tawpah chuan a ding ta tawl mai a. A khalh theih tawh loh thu leh mut harh lawk a duh thu a sawi a, ka khalh chhawk a, ka hnung bawh chuan a muhil ta sak sak a. A mu rei hauh lovang, a darkar zawng chuan. Mahse, kha hunah kha chuan rei ka va ti tak em! Namen lova tam ruah leh chhum hian min bawm reng a. Kawng hi a lang tawh lo hrim hrim. Head Light enga kawng sir lo lang riai riai ring chuan muangchangin ka tlan risk a. Tum thum vel phei chu tlanna lam hre lova din tawp ka nei. A hrehawmin a khawharthlak duh khawp mai. Chhum zing ka nin ber tum a niawm e. ‘En rawh chhum zingah a lokal’ tih hla te kha a ho zawngin ka ngaihtuah a, ‘Chhum zinga lokal hi kan Pathian pawh hian a peih nek lovang e’ ka ti hial nia.

Mualthuam ‘N’-ah a chatthla a lo harh a, meizial a rawn lam. Ka han pe a, a tanna tur kan nei ta hauh lo. Kan Lighter ah chu a lo alh thei tawh lova, mi an mu thup tawh si. In pakhat hi a la eng tha khawp mai a, Thiana chuan a zu kik thawr a, an lo hawng a. Anni Thalai Pawl Committee an lo ni a. A fuh lo khawp mai. Kawngka enga a han din takah chuan Thianpa lo balh zia mai chu! Laihchhuah hlim niawm hian hian chirh hlir hian a lo bawh luk mai a ni. Kei pawh ka bang bik hauh lovang le. Kan kalsan ta vat a.

Pukpui kan thleng chho tep tawh a, Km chanve dawn lai tur chirh turu lutuk mai a awm leh a. Inphurh chi a ni lo hrim hrim a, muangchangin a tawlh chho a, a hnungah kein ka um chho a. Engemaw chen a tlan hnu chuan Bike a thi ta hmiah mai. ‘A tlu a ni ngei mai’ ti rilru chungin hmanhmawh takin ka um chho a, a nal em avang chuan ke pawhin kal chak theih a ni lo. Ralkhat atang chuan, “Lo tlan teh” a rawn ti tial ruan mai a, ka hmanhmawh leh zual sauh. Thaw hlawp hlawpa ka han thleng chuan, tluk hreh tak, hian a Bike khalh lai chu lei si tep tawh hian a lo do ngar ngar a lo ni a. Tan hmun a nal em avangin a lo tung thei tawh bik si lo. A posi chu nuihzatthlak tak a ni. Mahse, nuih chi miah loh. Harsa takin kan chhuak thei hram a, zan dar khat velah chuan kan thleng ve hram.

Ka la tawn ngai loh ka tawn nasat em avangin mi ngaihin turu lo teh mahse, he kan zinkawng hi TURU ka ti ve ta mai a ni. Ka hre rei khawp ang le.

Kha mittui kha!!

Tung chhova piang hmeichhe ka hmangaih awm chhun a ni. Ka hmangaih tawh thin, ka hmangaih mek, ka la hmangaih reng tur a ni tel bawk. (Hmanah aiin tunah ka hmangaih zawk che! A love song version pawh hian he hla hi a lo dik mange!) Khawvel hi a zarah a par vul a, amah hi ka Khawvel a ni.

Ka sawi thin, ka sawi leh teh ang : A mitmeng pawl ram, tawrh har khawpa mawi atang hian hlimna chauh ka lo beisei thin a. Ngai teh! A lo ni bik awzawng lo mai! Mittui zu han luang chhuak ve thei a! Rangkachak tui lo luangchhuak thei hial awma mitmeng ropui leh zahawm atang khan, ni e, mittui pangngai tho a lo luang chhuak a nih kha! Aw! Kha favang tlai nitla tur eng phut mai kha aw... Nghilh ni reng ka nei lo’ng. A theih loh! A theih loh hulhual a ni, i hrethiam zel ang, lo ngai reng mah rawh aw...

Thenna biahthu kan inhlan mawlh mawlh a, inthenna tak tak biahthu a ni! A va mak em! Khuanu samsuih inkara inthenna biahthu hi sam A suih sak ve kher lohte inkara inthenna nen hian lo tehkhin lul lo teh u. Inthenna! Aw... A va tawp chiang tak em! ‘Thlafam vangkhua a lawi’ tih tawngkam hi kan kar thu nen hian tehkhin ta ila, a buk a inang khawp ang le! Eng pawh chu ni rawh se, duh vang ni hauh lovin ‘thenna biahthu’ zawng kan inhlan tlat mai si! Ni e, tawngkamin a daih tawh lo, ‘Thapui vawi khat chauh tal aw....’ tiin, kan infawp ta vawng vawng a... Aw.. kha hun kha chatuan nise, ral tawh ngai lo tura chelh din ka va duh tak em! Tawng ka-in hmun a chang tawh ngang lova, ani lah keimah ang tho... A tlin ta ngang lo mai le! ... A mit ropui atang chuan mittui a lo luang ngiai ngiai a! Chu mittui chuan he Khawvelah hian kan intawng leh ngai dawn tawh lo a ni tih a nemnghet chiang em em a ni... A tawp a ni... a tawp!

Hmangaihna kan tih thin, han sawi maia fiah tak anga lang, han tawnchilha vanneihna lallukhum min khumtirtu, han bihchiana beidawnna mai! Hei thu hian ka tehkhin duh; ‘Hmangaihna chu thlasika meiling vam sen huam mai, han aia nuam em em, mahse, zawimuanga chuai tial tiala mei vap mai lo chang leh si thin ang hi a ni’. Ni e, a chuai leh tlat si a nih hi! Hnutchhiah dang reng a nei lo, a vap chauh lo chu. Kan hmangaihna ve pawh hian hriatreng tur thil chauh lo chu min hnutchhiah bik lo chu a nih hi le! Kei ka chan chu ‘a vap’ chauh maw lo ni le! Ka chantawka khua rel hi pawm dan thiam harin pawm thiam lo teh mah ila, kei zawng ka thawk tawp thleng pawhin hei chauh hi zawng ka nghilh lul lawng - Kha mittui ngei mai kha!

Mahse, ringtu ka ni alawm, engah nge ka thla a phan viau thin chu le? He khawvel hi ka khualzinna ram mai a ni a, kumhlun tur ka ni hauh lo mai. Tichuan... enge ringtu nih hlawkna chu...? A tam thei ang. Mahse, hei te chauh hi tum tum atana ka tarlan duh chu a ni. Chu hmun nuamah chuan, inthenna reng reng hi a awm tawh lovanga, hlim takin chawnban vuanin kan leng dun leh ngei ang. Aw .... a va nuam dawn em! He hla chang hian a tlang ka’n kawm hial teh ang :

Sualin tling lo mah ila e,
Ka rawn dil zel anga Lalpa’n;
Min ngaidam ve anga,
A buatsaih sa chatuan ramah,
Kan la intawng leh dawn nia aw...
Thapui nang nen chuan.

He Video zawk hian le.....

In the twilight glow I see her blue eyes crying in the rain
And when we kissed goodbye and parted I knew we’d never meet again

Love is like a dying ember only memories remain
Through the ages I’ll remember blue eyes crying in the rain

Some day when we meet up yonder we’ll stroll hand in hand again
In a land that knows no parting blue eyes crying in the rain

Hmeltha Fee

May thla a ral leh mai dawn. Thlatin Article pakhat tal ka Blog-ah dah thin ka tum ve si a, tun thla chu a hna lama ka buai deuh vangin hun ka insiam thei ngang lo a ni. Tih miah loh aia thunawi te te ka’n vawm bei ve ngawt mai teh ang. Something is better than nothing tiin inhnem chawp phawt mai teh ang.

Kan thupui khi han sawifiah hmasa phawt ila : Ka farnu (Ka U) pakhat hi a naupan laiin an School-ah zirtirtute’n, “Fee la pe lo zawng zawng khan, naktukah May thla Fee lo ken theuh tawh tur, in nu leh pate hnenah lo sawi ang che u,” tiin an lo puang a. Ani naupanga thuchang, thu a lo dawngsawng fuh lo deuh nge? Ka nute hnenah chuan, “Hotuten naktuka Hmeltha Fee rawn ken theuh tur,” tiin a hrilh a, ka nute an buai hle a ni awm e.

Kum tinin May thla kan lo chuankai hian he thu hi ka ngaihtuah chhuak leh thin. Chuvangin thupuiah ka’n hmang teh ngawt a nih hi.

Kan thupui hi a pawimawh em em a, a lan dan ang ngawt hi a ni hauh lo tih chhiar zel la i hre mai ang. Heti hian point hrang hrangah lo then thliah thliah dawn teh ang :

1. Hmeltha i inti em?

Hmelthat chak lo mihring hi kan awm ka ring lova, Siamtu min duan dan pangngai pawh duhtawk lovin kan hmelhmang leh lan dan kan thlak kual chhen hlawm mai a nih hi. Miss Universe an thlanna-ah tum khat chu Contestant pakhat hian ‘Hmeltha i inti em?’ tih zawhna a dawng a. Ani chuan, “Pathianin mihringte hi duh tak leh tha ti em ema a siam vek kan ni a, chuvangin kei pawh hi hmeltha ka inti,” tiin a chhang a. Mipui lawm a hlawh khawp mai. A dik ngawt mai. Hmeltha kan inti lo a nih pawhin min siamtu Pathian hian tha ti taka min siam theuh kan ni a, keini pawh hi kan hmelah kan lungawi mai tur a ni.

2. Hmeltha hi hmuh an nuam

Nula hmeltha tak mai hmuh hi thil nuam tak chu a ni ve reuh ngawt mai. Engtin va ti lo mah ila, hmuh hrim hrim hi an nuam. Pangpar mawi tak te, Ram mawi leh nawm hmel tak te, In nalh leh ropui tak te kan hmuha kan thlek zui vawng vawng thin ang hian Hmeichhe hmeltha tak han hmuh chang hian thlekzui ve vawng vawng a chakawm thin. A mawi chiah bawk si lo.

3. Hmelthat hi vanneihna

Kan duh vang leh kan tum reng pawh ni lovin khawvelah hian kan lo piang theuh a. A then chu an hmeltha em em a, a then erawh chhe ve fe fe pawh an awm bawk a. A Fee an chawi pawh ni bik si lova, mi thenkhat a thlawna an hmeltha em em bik mai hi chu an vannei ngawt mai. Engpawh ti dawn ila, hmel hian kawng ro a su nasa ngawt mai. Hmelthate hi an vannei bik mange!

4. Hmelthat hi vanduaina

A then tan chuan hmel that hi vanduaina a ni ve leh thung si. Tleirawl hmeltha tak hi amahin a hmel a tha tih pawh a la inhriatthiam hma hauh atangin thenkhat chuan an rim nula chawp a. A hun hma-a sawn pai phah nan emaw an hman phah tlat thin. Thenkhat ve thung chu an ler phah em em a, an hmelin a lo zir bawka pasal neih tawh hnu thleng pawha buaina hrang hrang tawh phah an awm ve bawk.

5. Hmelah Baat a awm lo

Hmeichhe tam tak chuan pasal an dap kawngah hmel a zawngin an thlir lo. Sum leh pai ngah ngah hi an duh mai. Sum ngah ngah hmeltha tih hlate pawh a awm kha.

Article pawh a ni pha ta awm lo mange. Hel nuai tawp chuan a ziah tui theih loh. Duh tawk mai te’ng.